1. ภทฺทาลิตฺเถรอปทานํ
[1]
‘‘สุเมโธ นาม สมฺพุทฺโธ, อคฺโค การุณิโก มุนิ;
วิเวกกาโม โลกคฺโค, หิมวนฺตมุปาคมิฯ
[2]
‘‘อชฺโฌคาเหตฺวา หิมวํ, สุเมโธ โลกนายโก;
ปลฺลงฺกํ อาภุชิตฺวาน, นิสีทิ ปุริสุตฺตโมฯ
[3]
‘‘สมาธิํ โส สมาปนฺโน, สุเมโธ โลกนายโก;
สตฺตรตฺตินฺทิวํ พุทฺโธ, นิสีทิ ปุริสุตฺตโมฯ
[4]
‘‘ขาริภารํ [ขาริกาชํ (สี.)] คเหตฺวาน, วนมชฺโฌคหิํ อหํ;
ตตฺถทฺทสาสิํ สมฺพุทฺธํ, โอฆติณฺณมนาสวํฯ
[5]
‘‘สมฺมชฺชนิํ คเหตฺวาน, สมฺมชฺชิตฺวาน อสฺสมํ;
จตุทณฺเฑ ฐเปตฺวาน, อกาสิํ มณฺฑปํ ตทาฯ
[6]
‘‘สาลปุปฺผํ อาหริตฺวา, มณฺฑปํ ฉาทยิํ อหํ;
ปสนฺนจิตฺโต สุมโน, อภิวนฺทิํ ตถาคตํฯ
[7]
‘‘ยํ วทนฺติ สุเมโธติ, ภูริปญฺญํ สุเมธสํ;
ภิกฺขุสงฺเฆ นิสีทิตฺวา, อิมา คาถา อภาสถฯ
[8]
‘‘‘พุทฺธสฺส คิรมญฺญาย, สพฺเพ เทวา สมาคมุํ;
อสํสยํ พุทฺธเสฏฺโฐ, ธมฺมํ เทเสติ จกฺขุมาฯ
[9]
‘‘‘สุเมโธ นาม สมฺพุทฺโธ, อาหุตีนํ ปฏิคฺคโห;
เทวสงฺเฆ นิสีทิตฺวา, อิมา คาถา อภาสถฯ
[10]
‘‘‘โย เม สตฺตาหํ มณฺฑปํ, ธารยี สาลฉาทิตํ;
ตมหํ กิตฺตยิสฺสามิ, สุณาถ มม ภาสโตฯ
[11]
‘‘‘เทวภูโต มนุสฺโส วา, เหมวณฺโณ ภวิสฺสติ;
ปหูตโภโค หุตฺวาน, กามโภคี ภวิสฺสติฯ
[12]
‘‘‘สฏฺฐิ นาคสหสฺสานิ, สพฺพาลงฺการภูสิตา;
สุวณฺณกจฺฉา มาตงฺคา, เหมกปฺปนวาสสาฯ
[13]
‘‘‘อารูฬฺหา คามณีเยหิ, โตมรงฺกุสปาณิภิ;
สายํ ปาโต [สายปาโต (ปี.)] อุปฏฺฐานํ, อาคมิสฺสนฺติมํ นรํ;
เตหิ นาเคหิ ปริวุโต, รมิสฺสติ อยํ นโรฯ
[14]
‘‘‘สฏฺฐิ อสฺสสหสฺสานิ, สพฺพาลงฺการภูสิตา;
อาชานียาว ชาติยา, สินฺธวา สีฆวาหิโนฯ
[15]
‘‘‘อารูฬฺหา คามณีเยหิ, อิลฺลิยาจาปธาริภิ;
ปริวาเรสฺสนฺติมํ นิจฺจํ, พุทฺธปูชายิทํ ผลํฯ
[16]
‘‘‘สฏฺฐิ รถสหสฺสานิ, สพฺพาลงฺการภูสิตา;
ทีปา อโถปิ เวยคฺฆา, สนฺนทฺธา อุสฺสิตทฺธชาฯ
[17]
‘‘‘อารูฬฺหา คามณีเยหิ, จาปหตฺเถหิ วมฺมิภิ;
ปริวาเรสฺสนฺติมํ นิจฺจํ, พุทฺธปูชายิทํ ผลํฯ
[18]
‘‘‘สฏฺฐิ คามสหสฺสานิ, ปริปุณฺณานิ สพฺพโส;
ปหูตธนธญฺญานิ, สุสมิทฺธานิ สพฺพโส;
สทา ปาตุภวิสฺสนฺติ, พุทฺธปูชายิทํ ผลํฯ
[19]
‘‘‘หตฺถี อสฺสา รถา ปตฺตี, เสนา จ จตุรงฺคินี;
ปริวาเรสฺสนฺติมํ นิจฺจํ, พุทฺธปูชายิทํ ผลํฯ
[20]
‘‘‘อฏฺฐารเส กปฺปสเต, เทวโลเก รมิสฺสติ;
สหสฺสกฺขตฺตุํ ราชา จ, จกฺกวตฺตี ภวิสฺสติฯ
[21]
‘‘‘สตานํ ตีณิกฺขตฺตุญฺจ, เทวรชฺชํ กริสฺสติ;
ปเทสรชฺชํ วิปุลํ, คณนาโต อสงฺขิยํฯ
[22]
‘‘‘ติํสกปฺปสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[23]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, วิหริสฺสตินาสโว’ฯ
[24]
‘‘ติํสกปฺปสหสฺสมฺหิ , อทฺทสํ โลกนายกํ;
เอตฺถนฺตรมุปาทาย, คเวสิํ อมตํ ปทํฯ
[25]
‘‘ลาภา มยฺหํ สุลทฺธํ เม, ยมหญฺญาสิ สาสนํ;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[26]
‘‘นโม เต ปุริสาชญฺญ, นโม เต ปุริสุตฺตม;
ตว ญาณํ ปกิตฺเตตฺวา, ปตฺโตมฺหิ อจลํ ปทํฯ
[27]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺพตฺถ สุขิโต โหมิ, ผลํ เม ญาณกิตฺตเนฯ
[28]
‘‘อิทํ ปจฺฉิมกํ มยฺหํ, จริโม วตฺตเต ภโว;
นาโคว พนฺธนํ เฉตฺวา, วิหรามิ อนาสโวฯ
[29]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[30]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[31]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ภทฺทาลิตฺเถโร อิมา คาถาโย อภาสิตฺถาติฯ
ภทฺทาลิตฺเถรสฺสาปทานํ ปฐมํฯ
2. เอกฉตฺติยตฺเถรอปทานํ
[32]
‘‘จนฺทภาคานทีตีเร, อสฺสโม สุกโต มม;
สุสุทฺธปุลินากิณฺโณ, ปนฺนสาลา สุมาปิตาฯ
[33]
‘‘อุตฺตานกูลา นทิกา, สุปติตฺถา มโนรมา;
มจฺฉกจฺฉปสมฺปนฺนา [… สญฺฉนฺนา (ก.)], สุสุมารนิเสวิตาฯ
[34]